تسوى كام حضرتك ؟؟؟؟

لو حضرتك -أيها المواطن الشريف المسالم- حسبتها بالعقل وشوفت انتا تسوى كام في بلدك (بلدك مصر اللي هيا أمك برده) هتلاقي انك ياولداه ماتساويش تلاتة أبيض (ولا أي لون حتى) يعني زي قلتك , يعني ملكش لازمة , يعني كيلو ونص جوافة أغلى منك
وهوا انتا يعني -يا عافاك الله- هتبقى أغلى عندهم (هما مين ؟!) من الناس اللي غرقوا في العبارة وكان عددهم أكتر من ألف ومن مفارقات القدر ان العبارة كان اسمها السلام (هههه) , ولا الناس اللي جالهم تيفود وكوليرا لمجرد انهم شربوا ميه (حد يشرب ميه برده .. ماله الشاي بالنعناع يعني) , وقبلهم الغلابة بتوع قطرات الدرجة التالتة (ألا صحيح .. اشمعنى قطرات الدرجة التالتة بس هيا اللي بتعمل حوادث وبتولع .. اللهم لا اعتراض) , وغيرهم وغيرهم وغيرهم .. دي مصر يا عم
ده احنا يا راجل من كتر ما احنا مالناش تمن في بلدنا مابقالناش تمن في أي بلد تانية (ما هما معذورين برده .. هما هيحبونا أكتر من بلدنا يعني) وروح اتفرج على المصري كريم العنصرين اللي بقى ذليل كل العناصر في كل الدنيا وسلم لي على وزارة الخارجية وعلى وزيرها الحقل أحمد أبو الغيط .... حد فاكر العساكر المطحونين اللي اسرائيل قتلتهم على الحدود في رفح , وحتى ماكلفتش نفسها واعتذرت , وتعتذر ليه يعني هوا احنا اصلا كنا زعلنا (ولا تذمرنا ولا عملنا أي حركة حتى) عشان يكلفوا خاطرهم ويعملوا أقل واجب -شكليا حتى- ويعتذروا
بيتهيألي أسوأ حاجة انك تحس انك ملكش تمن في بلدك .. ولا لك قيمة ولا اعتبار ولا أي حاجة خالص (وجرح ذي القربى أشد مرارة على النفس من وقع الحسام المهند) .. حاجة تزعل , مش كده .. هوا كده فعلا , بس مقدرش أقولك غير ان كلنا في الهم واحد , وأفكرك بمسرحية "كأسك يا وطن" بتاعة المبدع السوري الراحل "محمد الماغوط" اللي قام ببطولتها "دريد لحام" وقال فيها انه حاول يسيب الوطن ويروح يدور على وطن تاني بس معرفش يعمل كده لأن الوطن عايش جواه .. هيروح منه فين بس .. هه ؟ .. ما ترد , ولا أقولك خللي الشاعر العراقي اللي مالوش حل "أحمد مطر" يرد ويقول: قطيع نحن والجزار راعينا
ولا أراكم الله مكروها في مواطن لديكم
****
:: حكيم عيون ::
dr_7akim3ion@yahoo.com