وشك للحيط .. وقفاك ليا

الحيطة .. الكلمة البسيطة دي بتمثل حاجات كبيرة في فكر ووجدان المصريين .. يعني نقدر نقول اننا بنتكلم عن الثقافة الحوائطية عند الشعب المصري .. خلينا نشوف

في الأول كده أحب أوضح اني أقصد الحيطة اللي هيا باللغة العربية "الحائط" , لأن كلمة الحيطة في اللغة العربية تعني "الحذر" .. وفي دي ممكن ترجعوا لأي معجم لغوي زي مختار الصحاح - أو حتى عبد الحميد الصحاح

بداية الحيطة معاك .. أيام ما كنت صغير وكنت تتأمر على أي حاجة كانوا يقولولك: اخبط دماغك في الحيط - قال يعني ده مابيحصلش وانتا كبير برده

وبعد ماحضرتك كبرت شوية ودخلت المدرسة .. لو في مرة مثلا كان الواجب انك تكتب سبعتاشر صفحة وحضرتك كتبته اتناشر بس , أو في الفصل كنت بتتكلم مع اللي جنبك في أي موضوع حيوي .. ساعتها أكيد كنت بتتذنب , وكان بيبقى وشك للحيط , وايديك مرفوعين كمان امعانا في تعذيبك

وطبعا مش ممكن ننسى الحيطة العزيزة في اي فصل دراسي او اي مكان كنا بناخد فيه دروس .. الحيطة العزيزة دي هيا اللي كانت بتشهد مراسم تكريم أسمائنا المبجلة عليها .. وعملا بمبدأ المشاركة الحوائطية .. كان الواحد يكتب اسمه ومعاه اسم المحبوبة - ده اذا كان في محبوبة يعني

والحيطة اللي بنسند عليها واحنا واقفين .. والحيطة اللي ياما شوطنا فيها الكورة .. والحيطة اللي دخلنا فيها بالعربية .. والحيطة اللي بنوقفها لو فيه فاول ضدنا واحنا بنلعب كورة .. والحيطة .. والحيطة .. والحيطة

لما الواحد يكبر بقى ويبدأ يفهم الدنيا ماشية ازاي من حواليه , ولو كان الواحد بيفهم أكيد الوضع مش هيعجبه , والطبيعي ان هوا يعبر عن كده ويحاول يغير الأوضاع المهببة اللي بيشوفها حواليه في كل مكان

يعني مثلا: لا سياسة البلد الداخلية نافعة , ولا الخارجية حتى , ولا تعليم نافع , ولا في شغل , ولا نزاهة في الانتخابات ولا في اي حاجة اصلا , ولا في ديمقراطية ولا حرية تعبير ولا حرية تكوين احزاب ولا .. ولا .. ولا

وطبعا لو حضرتك كنت انسان حقيقي ومتسق مع نفسك , أكيد مش هتسكت .. ساعتها هيقولولك: خليك جنب الحيط أحسن (الحيطة تاني .. حراااام) , وطبعا الغالبية العظمى بيجيبوا م الآخر وبيمشوا جنب الحيط - ياعيني ع السلبية

وأحب اقول لكل واحد كبر دماغه ومشى جنب الحيط انه كده ماريحش نفسه ولا حاجه , لأنه بيبعد عن المشاكل بس كده المشاكل هتيجي لحد عنده , وطول ما الواحد سلبي وماشي جنب الحيط ان شاء الله الحيطة دي هتتهد فوق دماغه

فنصيحة يعني .. اللي عايز يريح نفسه بلاش يمشي جنب الحيط .. يمشي جوا الحيطة أحسن .. ويبقى يقابلني بقى

**** **** **** ****

مصر تعيش أزهى عصور الديمقراطية .. وشك للحيط وقفاك ليا

**** **** **** ****

وناس من خلف شيش

خايفين من الشاويش

سلبية المية مية

تعالى .. لأ ماجيش

الفاجومي : أحمد فؤاد نجم

**** **** **** ****

ازاي شبابنا يقوم وياخد دوره

من غير صراخ يئذيه ويجرح زوره

يا هلترى أحسن له يقعد ساكت

أو ينترك .. ولو خرج عن طوره

عجبي

صلاح جاهين

**** **** **** ****

.. حكيم عيون ..

dr_7akim3ion@yahoo.com