يا جماله يا جماله

تصريح قريته في الصفحه الاولى من العدد الاسبوعي للاهرام (يوم الجمعة يعني) بيقول فيه السيد الأستاذ جمال مبارك ان الموازنة تسمح بتنفيذ الكادر الخاص للمعلمين
طبعا احنا مش بنحقد علي المعلمين (اللي هما المدرسين يعني مش المعلمين اللي في المدبح) ده اذا طالوا حاجة من وش الحكومة النظيفة اصلا , بس اللي أنا نفسي أفهمه هوا جمال مبارك بيتكلم بأي صفة , وماله هوا أصلا ومال الموازنة والحاجات دي
هييجي واحد يقولي ان جمال بيتكلم بصفته الحزبية علي اساس ان الحكومة هيا حكومة الحزب الوطني الحاكم اللي الاستاذ جمال يبقي رئيس لجنة سياساته , وده بقي ارد عليه باني اسأله مين اللي خللى الحزب الوطني حزب حاكم اصلا , ده احنا صحينا من النوم لقيناه حاكمنا بالعافية ومع سبق التزوير والترصد
بيتهيألي لو اتكلمنا بشكل رسمي يبقي الاستاذ جمال مالوش دعوة بموازنة البلد (اللي هيا بلدنا) ويخليه احسن في لجنة سياساته وجمعية شباب المستقبل بتاعته (ألا صحيح .. حد عمره شاف شاب مستقبل ؟!) , أما بقى لو اتكلمنا حسب اللي احنا شايفينه وواخدين بالنا منه علي اساس انها بلد ابوه وانه هيورثها فيبقى معاه حق ساعتها
المصيبة بقى ان موضوع التوريث ده بقي عيني عينك , تحس كده ان السلطة بتتنقل من الريس لابنه جمال بالتدريج (من غير ماتحس بيه) واحنا واقفين نتفرج , وأدينا بنتكلم , بس يظهر كده ان كتر الفرجة والكلام عملت حالة عامة من البلادة واللامبالاة , يعني الناس معدتش شايفة انها حاجة غريبة ان جمال يورث بعد ابوه
صحيح جمال قال قبل كده انه معندوش النية ولا الرغبة , بس افرضوا بقى عنده , وبعدين الحاجات دي مش محتاجة نية ولا رغبة .. ولا ايه
وبعيد عن نظرية المؤامرة بس احنا بنتكلم على اساس الواقع اللي احنا وكل الناس شايفينه , بس السؤال المهم دلوقتي لو جمال ورث فعلا تفتكروا احنا ممكن نعمل ايه ......................... يا رب استر
.. حكيم عيون ..