ويبقى انتا أكيد .. أكيد في مصر

تخيلوا لو حد فيكم فقد الذاكرة (زي مابيحصل في الافلام العربي) وبعد كده يصحى , ازاي بقى لما يصحى يعرف ان هوا في مصر بالذات دونا عن غيرها من بلاد الله في أرض الله الواسعة , بمعنى آخر ومن غير العك اللي فات ده , ازاي تعرف ان انتا أكيد .. أكيد في مصر (مش زي الأغنية المتكحولة بتاعتهم طبعا) .. تعالوا نشوف
****
بص بقي يا سيدي , أنا هأقولك ازاي تعرف ان انتا أكيد .. أكيد في مصر
أول ما تصحى من النوم وتفتح التليفزيون وطبعا هتكون مش مركز فممكن متاخدش بالك وتجيب القناة الاولي ولا التانية بتوع التليفزيون المصري الجاااااااااااااااااااامد , هتلاقي نشرة الاخبار في وشك , وطبعا كل الاخبار عن الريس (اللي مهشتكنا ومبشتكنا) , ولو فيه خبر محلي مالوش دعوة بالريس يبقي بتوجيهات من الريس وحرم الريس وابن الريس وجوز خالة الريس كمان , ولو فيه خبر عالمي مالوش دعوة بالريس يبقي لازم اي رئيس بلد تانية استفاد بحكمة الريس بتاعنا (حلوة حكمة الريس بتاعنا دي) .... كفاية كده , هات القناة التانية احسن .. بس ممكن يطلع حظك حظ عوالم وتلاقي في وشك اي اغنية وطنية (وللصدفة البحتة الاغاني الوطنية للريس برده) .. يعني مثلا: اخترناه وبايعناه واحنا معاه لما شاء الله (يانهار أصفر..معاه لما شاء الله..ربنا يستر علينا) .. بس كفاية مش قادر .... ماقولتلك هات الدش م الاول
قفلت يا سيدي التلفيزيون م الخنقة طبعا .. اوك هات الجرنان بقي .. بس بما انك منحوس هتقع في اي جرنان من اياهم .. ممكن تقرا الاهرام وتقرا لرئيس تحريره أسامة سرايا وتلاقيه بيعارض منع حبس الصحفيين (مع انه المفروض صحفي زيهم) .. ممكن تقرا اخبار اليوم وتلاقي رئيس تحريره ممتاز القط متأثر اوي من ان اعباء الرئاسة (حوش حوش) قال ايه حرمت الريس من الاستمتاع بطشة الملوخية وريحة التقلية زي بقية الناس (أنا عايز أعيط) .. وممكن بقي تقرا الجمهورية وتقرا برده لرئيس تحريرها محمد علي ابراهيم (كل ده اسم) وتشوف اد ايه هوا راجل ذواقة وكل اللي لفت نظره في لقاءات سياسية رسمية هوا لحم البعرور والمشويات والتبولة والحلويات الشامي !!!! .. ياعم ماتقرا الدستور ولا صوت الأمة وتريح نفسك
أكيدانتا كده اتقفلت .. انزل الشارع بقي .. وروح اي حتة (ده اذا لقيت حتة تروحها أصلا) .. وطبعا مش هتمشي .. تمام .. وقف تاكسي .. وبعد ماتركب على طول هتلاقي السواق بيقولك: الباب ماقفلش يا أوستااااذ .. اقفله يا عم .. وقبل ماتنزل ادفع الاجرة اللي يقولك عليها بدل متاخد كوريك في دماغك
انزل م التاكسي واترمي علي اي كافيه واطلب بتاع وشاي بالنعناع , وطبعا وانتا قاعد راسك هتتلوح من كتر الفرجة ع البنات اللي مش لاقيين حاجة يعملوها زيك بالظبط .. وبعدين ادفع حساب النسكافيه (ولا انتا كنت طالب ايه) وقوم امشي , بس مش تمشي ورا البنات برده .. كفاية الفرجة يا بجح
بس بقى يا سيدي .. لف في الشوارع شوية , ومتع نظرك بصور بابا حسني وماما سوزان وأونكل جمال في كل حتة .. وبعد هذا الفاصل من الابهار البصري المباركي في أزهى عصور الديمقراطية (وشك للحيط وقفــاك ليا) بيتهيألي بقى المفروض تروح بيتكم (أحسن الوحشين يعني) , وأنصحك بقى انك تنام .. يعني تهرب من الواقع للأحلام , وحتى لو كانت كوابيس أكيد هتبقى أرحم من كل السواد اللي احنا عايشينه في هذا العصر المباركي السعيد
بيتهيألي دلوقتي اتأكدت ان انتا أكيد .. أكييييييييييييييييد في مصر
ولا حول ولا قوة الا بالله
.. حكيــــم عيــــون ..