## حاجات ##

واقف في الشارع .. في عز الحر .. مستني تاكسي .. والناس رايحة وجاية .. في واحد ماشي مبسوط .. مش عارف ليه .. وواحد ماشي مهموم .. مش عارف برده ليه .. طيب ليه الطفل الصغير اللي هناك ده بيعيط .. وليه البنوتة الصغيرة دي ماشية فرحانة .. والنونو الصغير اللي مامته شايلاه ده واللي عمال يبص حواليه باندهاش ياترى فاهم اي حاجة في اي حاجة أصلا
تاكسي .. تاخد كام وتوديني فين يا أسطى .. هات اللي تجيبه وانزل هنا يا أستاذ .. شكرا
**** **** **** ****
واقف في الشارع .. في حتة ضل .. اتكلم براحتك .. دقيقة الموبايل ب49قرش .. ممكن الموبايل لو سمحت .. ثواني على ما الموبايل يفضى .. أديني مستني .. واحدة هيا اللي شاغلة الموبايل ومعطلاني .. هيا اللي جابته لنفسها بقى .. أنا مابحبش أكون متطفل .. بس هيا مش واخدة بالها ان صوتها عالي اوي .. ألو .. أيوه يا حازم .. انتا فين .. ايه .. لسه في البيت .. انا بقالي ساعة قاعدة ملطوعة في الكلية مستنياك .. ايه يعني .. ايه يا حازم اللامبالاة دي .. انتا مش بتحبني يا حازم .. أنا اللي استاهل .. أنا نفضت لكل الناس عشانك .. الواد بيدو ابن طنط آمال كان هيموت عشان يخطبني .. وأنا قفلته عشان خاطرك .. بس انتا طلعت ماتستاهلش .. أنا باندم اني حبيت واحد زيك .. مع السلامة يا حازم
لأول مرة في حياتي أشوف قدامي قصة حب وهيا بتنتهي في الموبايل .. ع العموم مش فارقة كتير .. وأهي قفشات قوم عند قوم تظبيطات .. يللا خللي بيدو يعيش ويخطب الأخت اللي كانت بتتكلم في الموبايل واللي كانت هيا وحازم (قال ايه) بيحبوا بعض .. أكيد حازم برده هيعرف يقضيها .. هيا الدنيا كده .. يوم فوق .. ويوم ماتفوقش
اتفضل الموبايل يا أستاذ .. شكرا .. خليني اتكلم وأخلص بقى .. .... .. الهاتف الذي طلبته غير متاح حاليا .. وعمره ما هيكون متاح أبدا
**** **** **** ****
عبثا بأقول وأقرا في سورة عبس
ماتلومش حد ان ابتسم أو عبس
في ناس تقول الهزل يطلع جد
وناس تقول الجد يطلع عبث
عجبي - صلاح جاهين
**** **** **** ****
.. حكيــــم عيــــون ..

شوفت عينيها ؟؟؟؟

الحب أعمى زي ما بيقولوا .. يعني اللي بيحب حد بيشوفه أحسن انسان في الدنيا , وده شيء طبيعي جدا (همال بيحبه ليه يعني) .. بس أكيد نظرة الواحد للانسان اللي بيحبه مش زي نظرة الناس العاديين
يعني ممكن مثلا تلاقي واحد صاحبك بيحب واحدة وانتا شايف انها نص عمر أصلا (اللؤلؤة المصون والمرأة الحيزبون) , وتقوم قايل لصاحبك هوا انتا مالقيتش غير دي تحبها , هيقوم يرد عليك ويقولك انك مش عارف تقدرها .. طيب انتا شوفت عينيها , وتيجي تشوف عينيها ممكن تطلع حولة أصلا .. ما علينا
طبعا الحاجات دي أزواق (ولولا اختلاف الأزواق لبارت السلع) وبيتحكم في الحكاية دي خليط من الشكل ومن المضمون مع اختلاف النسب من واحد للتاني على اعتبار ان دي مسألة نسبية في الأول وفي الآخر
ويمكن تبقي مسألة بسيطة ان الواحد يشوف حبيبه أجمل انسان في الدنيا , المشكلة بقى مش في الشكل .. المشكلة في الروح أو المضمون , يعني م الآخر يبقى الواحد بيحب شخصية معفنة وفاكر انه بيحب ملاك , مع ان مافيش ملايكة بتمشي ع الأرض أصلا
انما انتا شوفت عينيها ؟؟؟؟
.. حكيم عيون ..

بهجة الموت وفوائده

الموت حقيقه مجرده لاتوجد فيها اى فلسفه فعندما نقول ان فلانا مات فهذا معناه انه مات فعلا (جديده مش كده) وطبعا عارفين ان النوم هو موت كده وكده. الفارق بين النوم والموت هو انه لما بتنام محدش بيزعل عليك مع أنك فى حكم الميت بس هو بيبقى عامل حسابه انك هتصحى تانى مع ان ده دايما مش صحيح وغالبية الناس اللى بتموت بتموت وهيا نايمه .....وطبعا انك تزعل لما واحد غالى عليك يموت دا شئ اكيد ومؤكد إلا إذا كنت بتنافقه ودى كانت امنيه من امنياتى فى يوم من الأيام انى أموت بس فى نفس الوقت أبقى عارف مين اللى هيعيط عليا بجد من قلبه ومين اللى هيعيط عشان التلفزيون بيصور ويبان انه كان زعلان عليا قوى...دا طبعا غير السوقه والدهماء والرعاع اللى مش هيعيطوا ورغم كده بيعملوا زعلانين
بذمتك ياشيخ كام مره حسيت انك ممكن تموت وانت ماشى كده لا لك ولا عليك مره واحد تلاقى نفسك جسد بعد روح دا الكلام ده وانت ف الشارع
وكام مره قبل ماتنام جه ف باللك الموضوع وانك ممكن تنام متقومش تانى وقمت بسرعه اتوضيت وصليت العشاء مع ان الفجر خلاص هايدن وبعد ماتصلى العشاء وتسمع ادان الفجر تقول هاريح شويه قبل الإقامه وهوب تلاقى روحك طايره فوق ولافرقت معاهه فجر ولا جمعه
ده طبعا غير لما تيجى فتره وتلتزم وتحاول تبقى متدين وتلاقى نفسك لازم كل شويه تفتكر الموت وتتمنى انك تموت وانت بتصلى أو وانت بتقرأ قرأن وياسلام لو كنت صايم .... وياسلام بقى لو حد تعرفه مات فى شهر رمضان وتلاقى الناس تقوللك دا ربنا بيحبه انه مات فى الأيام المفترجه دى... قال يعنى بقى كل الللى بيموت فى الأيام المفترجه دى هايدخل الجنه طب حتى لو كان مسلم من بتوع البطاقه ؟؟؟؟؟؟؟؟؟؟.
مره كنت ماشى مع واحد صاحبى وساكتيين وفجأه وبدون مقدمات ألاقيه بيقول : أموت واشوف جعران
ياحلاوه مستغنى عن دنيته وحياته قصاد انه بس يشوف جعران ونعم الامانى ..ادعوله ربنا ينوله اللى ف باله ويشوف الجعران بس من غير مايموت فدا رؤية الجعران

ومره تانيه كده قاعدين لاقينا واحد بيقول نفسه يموت بعد مايكا اكله تكبس على نفسه(دكر بط ليه لوحده مع حلة محشى مع جوز حمام) وبعد كده مش هايبقى عايز حاجه تانى من الدنيا
وعلى رأى اللى قال:ء
لكل شئ إذا ماتم نقصان فلا يغرنك بطيب العيش حيوان

أو حتى على رأى المتنبى :ء
إذا لم يكن من الموت بد فمن العار أن تموت إلا إذا رأيت جعرانا

وطبعا محدش يقدر ينكر ان الموت كله فوائد خصوصا للميت
اول هذه الفوائد وأهمها راحة البال وراحة الجسم وخصوصا لو كان عنده مرض عضال قبل مايموت.
وياسلام لوكان فيه حد قارفك فى حياتك ساعتها هتبقى مبسوط أوى وطبعا غير كده لا هتفرق معاك الجو برد ولا الجو حر لان فى التراب اللى حواليك مبتفرقش يامعلم
طبعا مش هاتفضل تعذب نفسك بالوهم اللى اسمه التعليم أوالإشاعه اللى اسمها الوظيفه وطبعا مبيبقاش فيه حد بيطلب منك ضرايب ولا حتى فلوس سلف ولا حد رخم يجى يزن فى ودانك وياكللك نصهم
وياسلام لو كنت بتحب حد بقا كده ولا كده وهو نفضللك تبقى نفسك تشوفه طبعا عشان بتحبه ونفسك ماتشوفوش تانى أبدا عشان اللى عمله معاك وعشان انت مش لازم تحتار قدامك الهروب إلى النوم أو إلى .............ء

وطبعا يومك هيبقى كله نوم ومش هتحتاج لا أكل ولا شرب ولا اي حاجه خالص ولا فارقه معاك حد يعمل حواليك دوشه ..... ياااااه
دا الموت حلو قوى ..... طب ماتيلا ياجدعان بس للأسف مفيش طريقه غير الإنتحار وبما إن الانتحار حرام هيبقى قدامنا البديل الشرعى وهو النوم فلنغط فى نوم عميق حتى الموت ...... ولا رأيكوا ايه؟؟؟؟
وحدووووووه



*****الميكانيكى******

lala2007_00 @ yahoo . com

ويبقى انتا أكيد .. أكيد في مصر

تخيلوا لو حد فيكم فقد الذاكرة (زي مابيحصل في الافلام العربي) وبعد كده يصحى , ازاي بقى لما يصحى يعرف ان هوا في مصر بالذات دونا عن غيرها من بلاد الله في أرض الله الواسعة , بمعنى آخر ومن غير العك اللي فات ده , ازاي تعرف ان انتا أكيد .. أكيد في مصر (مش زي الأغنية المتكحولة بتاعتهم طبعا) .. تعالوا نشوف
****
بص بقي يا سيدي , أنا هأقولك ازاي تعرف ان انتا أكيد .. أكيد في مصر
أول ما تصحى من النوم وتفتح التليفزيون وطبعا هتكون مش مركز فممكن متاخدش بالك وتجيب القناة الاولي ولا التانية بتوع التليفزيون المصري الجاااااااااااااااااااامد , هتلاقي نشرة الاخبار في وشك , وطبعا كل الاخبار عن الريس (اللي مهشتكنا ومبشتكنا) , ولو فيه خبر محلي مالوش دعوة بالريس يبقي بتوجيهات من الريس وحرم الريس وابن الريس وجوز خالة الريس كمان , ولو فيه خبر عالمي مالوش دعوة بالريس يبقي لازم اي رئيس بلد تانية استفاد بحكمة الريس بتاعنا (حلوة حكمة الريس بتاعنا دي) .... كفاية كده , هات القناة التانية احسن .. بس ممكن يطلع حظك حظ عوالم وتلاقي في وشك اي اغنية وطنية (وللصدفة البحتة الاغاني الوطنية للريس برده) .. يعني مثلا: اخترناه وبايعناه واحنا معاه لما شاء الله (يانهار أصفر..معاه لما شاء الله..ربنا يستر علينا) .. بس كفاية مش قادر .... ماقولتلك هات الدش م الاول
قفلت يا سيدي التلفيزيون م الخنقة طبعا .. اوك هات الجرنان بقي .. بس بما انك منحوس هتقع في اي جرنان من اياهم .. ممكن تقرا الاهرام وتقرا لرئيس تحريره أسامة سرايا وتلاقيه بيعارض منع حبس الصحفيين (مع انه المفروض صحفي زيهم) .. ممكن تقرا اخبار اليوم وتلاقي رئيس تحريره ممتاز القط متأثر اوي من ان اعباء الرئاسة (حوش حوش) قال ايه حرمت الريس من الاستمتاع بطشة الملوخية وريحة التقلية زي بقية الناس (أنا عايز أعيط) .. وممكن بقي تقرا الجمهورية وتقرا برده لرئيس تحريرها محمد علي ابراهيم (كل ده اسم) وتشوف اد ايه هوا راجل ذواقة وكل اللي لفت نظره في لقاءات سياسية رسمية هوا لحم البعرور والمشويات والتبولة والحلويات الشامي !!!! .. ياعم ماتقرا الدستور ولا صوت الأمة وتريح نفسك
أكيدانتا كده اتقفلت .. انزل الشارع بقي .. وروح اي حتة (ده اذا لقيت حتة تروحها أصلا) .. وطبعا مش هتمشي .. تمام .. وقف تاكسي .. وبعد ماتركب على طول هتلاقي السواق بيقولك: الباب ماقفلش يا أوستااااذ .. اقفله يا عم .. وقبل ماتنزل ادفع الاجرة اللي يقولك عليها بدل متاخد كوريك في دماغك
انزل م التاكسي واترمي علي اي كافيه واطلب بتاع وشاي بالنعناع , وطبعا وانتا قاعد راسك هتتلوح من كتر الفرجة ع البنات اللي مش لاقيين حاجة يعملوها زيك بالظبط .. وبعدين ادفع حساب النسكافيه (ولا انتا كنت طالب ايه) وقوم امشي , بس مش تمشي ورا البنات برده .. كفاية الفرجة يا بجح
بس بقى يا سيدي .. لف في الشوارع شوية , ومتع نظرك بصور بابا حسني وماما سوزان وأونكل جمال في كل حتة .. وبعد هذا الفاصل من الابهار البصري المباركي في أزهى عصور الديمقراطية (وشك للحيط وقفــاك ليا) بيتهيألي بقى المفروض تروح بيتكم (أحسن الوحشين يعني) , وأنصحك بقى انك تنام .. يعني تهرب من الواقع للأحلام , وحتى لو كانت كوابيس أكيد هتبقى أرحم من كل السواد اللي احنا عايشينه في هذا العصر المباركي السعيد
بيتهيألي دلوقتي اتأكدت ان انتا أكيد .. أكييييييييييييييييد في مصر
ولا حول ولا قوة الا بالله
.. حكيــــم عيــــون ..

جمال ناوى ينونونا.......إوعى وشك

امبارح كان أول يوم فى مؤتمر الحزن الوثنى وطبعا كان لازم مستر جيمى يلقى كلمه تليق بمقام سيادته
فهو (غصبن عن عين اهلى) الوريث الشرعى للبلاد .....ئ
افتتح المحروس كلمته بنقطه فى غاية الأهميه وهى ان هذا المؤتمر ليس للتباهى ولا المنظره يعنى
(لامنظره ولا مئوره دا عريسنا فاكهه مسكره)
وبعدين باقى العمليه سخنت معاه اعلن الأخ جيمى ان الحزن وياللعجب يسير على الطريق الصحيح (إوعى يااااااااله)وكأن دى حاجه غريبه انهم يبقوا ماشيين صح ده اصلا لو كان فيه طريق ...
وبعدين قال ايه ان الهدف من كل الإصلاحات اللى الحزب بيعملها هدفها المواطن البسيط وطبعا ده واضح لان المواطن البسيط ده طلعت عين اهله طبقا لتوجيهات الرئيس اسم النبى حارسه
كما دعا أمين السياسات الحضور إلى المشاركة في مناقشة ورقة سياسة الطاقة التى اصبحت قضية محورية للتنمية.
وقد حان الوقت لطرح الدخول فى استغلال مصادر بديلة للطاقة وخاصة الطاقة اللى بيقولو عليها نوويه شفت ازاى ياخى قال ايه عايزين يبقى عندنا طاقه نوويه طبعاالصدمه كانت جامده وحسيت ياخويا ان احمدى نجاد بيتكلم لكن ولله الحمد افاقنى من الصدمه الوزير البرجماتى سامح فهمى واللى صحح الفكره وانه مش زى مالناس متخيله (وده طبعا لأن الحزب مينفعش يعمل اللى الناس متخيلها ليه هيا فوضى ياحوش لما الحزب يعمل زى ماحنا متخيلين تبقى الهلمه دى كلها والوزرا والحكومه لازمتها ايه...قال الناس متخيله قال)
سيادة الوزير قال ايه ان الطاقه النوويه اللى هنعملها دى عشان نولد منها كهربا عشان تنضفو يا غجر
. يعنى بدل الكهربا هيبقى عندنا نونوه
يعنى بدل مانقول الكهرباءقطعت هنقول النونوه قطعت
وبعدين تطلع علينا صحف ذوات القرنين(القوميه)بمانشيتات زى
توصيل النونوه الى جميع العشوائيات
الرئيس يفتتح محطه النونوه الجديده بسيدى ورور
فواتير النونوه نار
اما بقى اجمد حاجه فى كلمه جيمى كانت عندما تقمص دور احمد ى نجاد وقال إيه انه بيرفض التدخل الأمريكى ف الشرق الأوسط وبيرفض كمان (شوف قله الذوق ياأخى) اسمه ايه ده مشروع الشرق الأوسط الكبير
لسه فاكر ان امريكا كانت عايزه تعمل حاجه اسمها الشرق الأوسط الكبير وبعدما المشروع فشل واندفن واتحلل وريحته بقت أقذر من ريحة أبوه(الحاج حس حس)جاى يقوللك نحن نرفض (إوعى يااااااااااااله)

من كل قلبى إلى السيد جمال رب الصون والعفاف
( ياحلاوة الدنيا ياحلاوه)



ميكانيكى

عايزين ايه ؟؟؟؟

هو احنا عايزين ايه؟؟؟؟؟ سؤال بنسأله مليون مره في اليوم وبرضه مش هتلاقي اجابه يا شاطر عارف ليه علشان انت اصلا مش شاطر, لانك لو شاطر مكنتش سالت السؤال ده .. حد فاهم حاجه عموما انا نفسي مش فاهم
عارفين انا قابلت ناس كتير اوي كل واحد ليه حاجه بتبسطه ده ان كان فيه حاجه تبسط او تفرح اصلا .. واحد يبقي مبسوط اوي وهو بيكلم بنت ويقولك يا سلام هي دي الدنيا ولا بلاش .. التاني يقولك يا سلام علي الزغلول (البانجو يعني) لما اشد فيه ببقي حاسس اني طاير .. التالت يقولك الكتاب ده جامد اوي متاخد تقراه .. الرابع يقولك انا قمة الروقان عندي اني اقعد مع اصحابي اقوله وفين اصحابك يقولي خلاص بقي كان زمان وجبر .. الاخير ده بقي حبيب قلبي يقولك يا عم صلي علي النبي هو فيه حاجه تفرح اصلا وبصراحه مش هتفرق معايه كله خنقه .. اقوله قشطه يا مان والله انت زي الفل بس ناقصك كام شورت ابيض وعليه تشيرت ابيض علشان تكون فريق الاحلام .. طبعا عرفينه, صح اكيد عرفتوه لان الفريق ده بصراحه هو اللي هيخرجك من جو الاكتئاب ده .... ابقي قابلني بقي لو فرحت
بصوا بقي من الاخر كل واحد هو اللي بيدور علي اللي يتعبه ويعمله طبعا مش علطول مش في الغالب كده احنا اصلا بطبيعتنا متمردين مش عاجبنا حاجه هو بصراحه مفيش حاجه تعجب بيني وبينكم بس مهو مش هنفضل كده لازم نفرح .. اللي مرتبط مش عجبه اقوله ليه ياعم, يقولك ياعم الموضوع متنشن شويه.. اقوله ايه ؟ يقولي فيه شوية خلافات ..اقوله ايه ياحماده المشكله يقولي اصلها مش بترلنلي الا كل ربع ساعه
طبعا انا الطم علي وشي واقوله بجد عندك حق يبني انت كده هتموت لازم ترنلك كل 3 ثواني بس بلاش اقل من 3 ثواني لانها ممكن توحشك يقولي طيب دي اتحلت اقوله تمام يقولي فيه مشكله كمان اقوله ايه يا ميدو يقولي انها عايزه تخس شويه اقوله بس كده دي حاجه سهله اوي تعمل دايت يقولي لا مهو مينفعش معاها دايت اقوله بس يا ميدو لو ممشتش من ادامي دلوقتي هجيب اونكس (اللي بتلم الزبالة) تشيلك , الله يحرقكم مليتو البلد
اهو ميدو او حماده ده عايز شوية زيت زمزم بتاع التموين اللي ريتحه حلوه ده اكيد عرفينه علي شوية فول مسوس من بتاع التموين برضه علي شويه عدس مسوس يبقي منين؟؟؟؟؟ هتقولي التموين هقولك برافو كسبت معانا كيلو سكر بنمله من بتاع التموين. المهم نخلط ميدو بالحاجات دي وفي فرن تحت درجة حرارة 120 ونولع عليه بس متنساش تحط نقطة زيت تحته لحسن يلزق ومتعرفش تطلعه تاني
خلينا في عمك برعي بقي اللي مش مرتبط برعي ده بقي مشكلته مشكله يقولك لو بس الاقي واحده احبها وتحبني , اقوله ياحاج برعي انت كده فل يقولي اشمعنا انا من اصحابي اللي طول اليوم ماسكين الموبايل الو الو , اقوله منتا متعرفش انهم هما اللي باعتين الرصيد بس قال يعني هي اللي بتتصل ويقولك ياعم انا خسران حاجه ماهما اللي بيتصلو عايزك تفقسه كده لحسن يقول عليك واد مش بوب
بس بصراحه برعي ليه حق لما الواحد يلاقي واحده بتحبه وبتسال عليه ومعاه دايما مضحكش عليكم بتكون احلي حاجه في الدنيا يا سلام بقي لو انت بتحبها كمان يبقي فل الفل بس يعني مش ملاحظ انك طماع ,يارب ياخويه تلاقي كده بس ابقي قابلني تحت تمثال سعد زغلول .. برضه هتدخل في اللي ملكش فيه وتقولي ايه تمثال سعد ده هقولك تبقي مقابلتش بنات من علي النت قبل كده وهقولك يبقي المنتزه او المعموره , المهم انها اماكن تلاقي اصحاب النت اللي مشفوش بعض قبل كده بس سيبك انت بجد بيكون موقف جامد اوي اكيد جربته ولا ايه؟؟؟؟ عايزك تحكيلي علي اللي بيحصل لما تقابل واحده اول مره وتلاقيها زي البطيخه متعرفش وشها من قفاها بتعمل ايه بزمتك مش بتجري او بتقولها معلش ثواني معايه تليفون قال يعني حد اتصل وتقولها معلش انا هروح لحسن عندي فرح دلوقتي المصيبه ان ممكن ده يكون الضهر طيب حتي اختار حاجه تانيه غير الفرح وتقولك ماشي وهي زعلانه اوي قال يعني بتحس وتمشي وتمسح رقم موبايلها وتغير رقمك بعدها علطول حد قالك تعرفها من الاول .. ويقابل غيرها وغيرها وهكذا دواليك علي راي كتاب العربي الخ.....ابقي قابلني بقي لو كنت عارف انت عايز ايه ؟ والنبي لو عرفت اتصل علي 09009191 وابعتلي رنه كول بس معلش اصلي قافل المحمول ...علي فكره كده كده النغمه مش هتوصل لانك ابقي قابلني لو عرفت انت عايز ايه؟؟؟؟؟؟؟؟؟؟
.. شنكوتي ..

يا جماله يا جماله

تصريح قريته في الصفحه الاولى من العدد الاسبوعي للاهرام (يوم الجمعة يعني) بيقول فيه السيد الأستاذ جمال مبارك ان الموازنة تسمح بتنفيذ الكادر الخاص للمعلمين
طبعا احنا مش بنحقد علي المعلمين (اللي هما المدرسين يعني مش المعلمين اللي في المدبح) ده اذا طالوا حاجة من وش الحكومة النظيفة اصلا , بس اللي أنا نفسي أفهمه هوا جمال مبارك بيتكلم بأي صفة , وماله هوا أصلا ومال الموازنة والحاجات دي
هييجي واحد يقولي ان جمال بيتكلم بصفته الحزبية علي اساس ان الحكومة هيا حكومة الحزب الوطني الحاكم اللي الاستاذ جمال يبقي رئيس لجنة سياساته , وده بقي ارد عليه باني اسأله مين اللي خللى الحزب الوطني حزب حاكم اصلا , ده احنا صحينا من النوم لقيناه حاكمنا بالعافية ومع سبق التزوير والترصد
بيتهيألي لو اتكلمنا بشكل رسمي يبقي الاستاذ جمال مالوش دعوة بموازنة البلد (اللي هيا بلدنا) ويخليه احسن في لجنة سياساته وجمعية شباب المستقبل بتاعته (ألا صحيح .. حد عمره شاف شاب مستقبل ؟!) , أما بقى لو اتكلمنا حسب اللي احنا شايفينه وواخدين بالنا منه علي اساس انها بلد ابوه وانه هيورثها فيبقى معاه حق ساعتها
المصيبة بقى ان موضوع التوريث ده بقي عيني عينك , تحس كده ان السلطة بتتنقل من الريس لابنه جمال بالتدريج (من غير ماتحس بيه) واحنا واقفين نتفرج , وأدينا بنتكلم , بس يظهر كده ان كتر الفرجة والكلام عملت حالة عامة من البلادة واللامبالاة , يعني الناس معدتش شايفة انها حاجة غريبة ان جمال يورث بعد ابوه
صحيح جمال قال قبل كده انه معندوش النية ولا الرغبة , بس افرضوا بقى عنده , وبعدين الحاجات دي مش محتاجة نية ولا رغبة .. ولا ايه
وبعيد عن نظرية المؤامرة بس احنا بنتكلم على اساس الواقع اللي احنا وكل الناس شايفينه , بس السؤال المهم دلوقتي لو جمال ورث فعلا تفتكروا احنا ممكن نعمل ايه ......................... يا رب استر
.. حكيم عيون ..

اتنين من الناس ...المغزى والهدف

طبعا كلنا عارفين ان اتنين يعنى واحد وكمان واحد. وواحد من الناس يعنى بلال فضل يعنى اجمد كاتب فيكى يابلد وبماأننا
اللى هوا احنا نكن عظيم الاعجاب وكل حاجه حلوه للراجل ده كان لازم المدونه تيجى على حاجه من ريحته..ء
وبما ان اروع اعماله هيا واحد من الناس وبما اننا اتنين ....يبقى كده المغزى واضح
أما بقى الهدف دا عباره عن حاجات كتير جوانا وملغبطه شويه معارضه على شويه نفسنه على شوية فلسفه ذاتيه على شوية ثقافه جوانيه على كتير من الهبل, المهم الحاجات دى ولدت عندنا هدف وان كان لسه لحد دلوقت مبه بس اكيد سوف ينقشع الغبارويظهر ويبان عليه الأمان بس ربنا يسهلنا ويسهلكم..ا
أما بقى احنا مين ؟ فعلى حد علمى وزى مالناس بيقولوا ان احنا اتنين قال إيه مصريين وبما اننا مصريين يبقى اكيد مطحونين فى جميع مناحى الحياه ومسحوقين تحت اقدام الديكتاتوريات والشموليات فى كل حاجه وف اى حته...ء
ديكتاتورية البيت وديكتاتورية الشارع وديكتاتورية سواق الميكروباص وديكتاتورية الكليه بدايه من العميد لحد اصغر فراش وكل واحد عايز يمشى اللى ف دماغه..... وطبعا مانقدرش ننسى الديكتاتوريه الكبيره هايص بتاعة حسنى المخرف وننوس عينه امه جيمى المهلفط وطبعا امه ماما سوزى فليذهبوا الى الجحيم وربنا يريحنا منهم قادر ياكريم
.........ميكانيكا وبس.................

الجامع في علم النفسنة

عمرك شفت واحد منفسن (أو واحدة منفسنة .. سيان يعني) .. المنفسن ده يا حلو هتلاقيه المفروض انه صاحبك بس ايه بقي , م الآخر كده بيقطع عليك تقول اي كلمة يحرجك (انتا أهطل يا بني ولا حاجة) وانتا لابس الحتة الجديدة يا عم يتريق عليك ويخليك هاين عليك تطلع من هدومك (لو كنت ولد طبعا) انتا شاري موبايل جديد , هههه (ده بيأ يا عم) انتا جايب عربية ظغنطوطة .. دي عربية لعبة ولا ايه (وهوا ماعندوش عجلة أصلا) .... اللي فات ده كله امثلة للنفسنة .. وما خفي كان اعظم ربنا يحمينا ويحميكم م النفسنة
في واحد اسمه محمد فتحي (متفكروش في اسمه .. محدش هيعرفه) قال : .. وانا صاحبي منفسن على صاحبي .. نفسنله في السكة عليا .. فكرني باني تلميذه .. وبانه عظيم مية المية .. مع اني منفسن علي نفسي .. وباحاول ابيع اي قضية .. كان لازم انفسن على صاحبي .. فسامحني يا صاحبي يا مش صاحبي .. ملعون ابو ام الصحوبية
ودمتم "منفسنين" ملحوظة: أنبوبة البوتاجاز "بتنفس" مش "بتنفسن" , وذلك لتجنب الفهم الخاطيء وسمعني سلام صعبت عليا نفسي .. يمكن أعيط
.. حكيم عيون ..

أنا متسلط .. اذن أنا موجود

دايما نسمع الكلام بتاع الشعب المصري طيب وكله تمام , ماشي يا سيدي علي عيننا وراسنا كمان , بس مش عارف ايه اللي حصل , أكيد كلكم واخدين بالك من ظاهرة "التسلط" , ودي طبعا ملهاش علاقة بالسلطة اللي بناكلها .. نجيب م الأول , لو حد فيكم شاف اتنين بيتخانقوا (منظر نايس خالص) أو حتى بيشدوا في الكلام بس , هتلاقي كل واحد مفيش علي لسانه غير كلام من نوعية: انتا مش عارف انا ابقى مين - انتا مش عارف انا ابن مين في مصر(ابن بارم ديله مثلا) - انتا مش عارف انا ممكن اعمل فيك ايه - انا اوديك في داهية(نوع من التغيير الواحد ماراحش في داهية قبل كده) .. بلاش دي , لو انتا ظابط لسه متخرج ومعلق دبورة واحدة , ملازم يعني (وحياتك بيبقوا لسه في الكلية) تلاقي عربيته ايه: تفييم ونمر سودا وابقى قابلني لو عرفت تقرا النمرة اصلا , وانتا يا حلو لو عملت كده ابقي شوف حد يجيبلك الرخص بقي (ويجيبلك كرامتك معاها) .. المشكلة ان كل واحد بيحاول باي طريقة انه يبقي متسلط ع الناس , طيب ايه الشطارة يعني انك تتنطط علي واحد غلبان اصلا (ماهو لو مش غلبان مش هتقدر تكلمه) .. بلا وجع دماغ يا راجل .. ربنا يصلح الاحوال
.. حكيم عيون ..

أهلا بيكم في بلدكم التانية .. مصر

بعد صباح الخير يامصر ومساء الخير يامصر.. أدينا بنقول تصبحى على خير يامصر ونوم العوافى يا مصريين ...
دلوقت الجو بقى رايق البلد نامت والناس نامت قول مابداللك يادكتور احمد (قسم وسمعنى ) : يا ليييييييييييييل
ولا بلاش وبما اننا يا بشمهندس عبدالله اتنين من الناس , يبقى لازم نظبط المنبه ونصحى بقية الناس
........

: وزي مابيقول عمكم الفاجومي

ياأهل مصر المحمية .. بالحرامية
الفول كتير والطعمية .. والبر عمار
والعيشة معدن وأهي ماشية .. آخر أشية
مادام جنابه والحاشية بكروش وكتار
وكفاية أسيادنا البعدا .. عايشين سعدا
بفضل ناس تملا المعدة .. وتقول أشعار
أشعار تمجد وتماين .. حتى الخاين
وان شاالله يخربها مداين .. عبد الجبار
عبد الجبار مين ؟؟؟؟؟؟؟؟؟؟؟؟؟؟